أحَبّ الناس لاتبطي علينا *** ترانا لو شربنا ما ارتوينا
أمنّي عيني بْشوفة جمالك *** لعل الوقت يسمح لك تجينا
يفزّ القلب لك مع كل هاتف *** عسَى اللّي مانسينا.. مانسينا
أنا لك مثل برقٍ في سحابه *** تولعني واصوّت بالحنينا
وانا لك مثل صقرٍ عقب حومه *** تنكّس لين وقّع باليدينا
وانا لك مثل نبتٍ ظاميٍ لك *** إذا جاه الوَسِمْ عوده يلينا
وانا لك مثل شاعر للقصيده *** يِغنّي لو بكَى قلبه حزينا
ترفّق يا حسين الدّلْ تكفى *** ترى والله ما غيرك بغينا
إذا مرّتك نسمة شوق تسري *** تراها داعي الاشواق فينا
تلطّف.. ثم تلطف.. ثم عود *** ترى لو شافني صخرٍ يلينا
ولو تسمع نجوم الليل شعري *** مشتْ لك تطلبك ترفق علينا