مرحوم يا شيخٍ بنَى للمجد دوله ودين
وحّد قبايلها وعلَّى بالشرف شانها
عبد العزيز الّلي له القاسي يطيع ويْلين
تهتزّ ساحات الوغَى لَى طب ميدانها
يفخر به التاريخ وتردّد نباه السنين
وتشهد له الخيل الأصايل واشهب سنانها
لَى ضاع راي الناس رايه بالشدايّد يبين
وان ضاعت الهقوات قاد زْمام شجعانها
نادر حرارٍ ما يصيد إلّا سمين وْثمين
لَى هد ما تفرد صقور الجو جنحانها
من مثل أبو تركي إلَى ضاقت يسر الحزين
يبري عيونٍ من سهرها مل سهرانها
* * *
لمعة أمل تلعب على موجة السيف
والشط ممدود مثل صادي السيف
والشمس تجلد بالشعاع الصحاري
والريح تبني بالعجاج العواصيف
فوق البحر موج وفوق الرمل موج
والحلم سيف يلمع بكفه رهيف
* * *
وقف.. وظهره للبحر *** ولنجد وجهه والنظر
طويل قامه.. طويل ذراع *** رفيع هامه.. وصيته ذاع
* * *
في جبينه نر غضبان العرق
والخطر والعزم في عينه برق
والأمير المغترب عبد العزيز
لاح نوره في سما نجد وشرق
* * *
وانتهض مثل العقاب اللّي شهر
وحوّلت كل الصقور الّلي تحوم
صار يومه عنده أطول من شهر
ملك ابوه وجدّه الغالي يروم
* * *
يطوي الفيافي والنّفود
ينزل ويرقاها سنود
والكايده مهما تكود
عزايم مْعزّي تزود
* * *
حاولوا يثنون عزمه بالكلام وبالسلاح
وردّهم بالقول والأفعال وبروس الرماح
* * *
على الركايب وفوق الخيل *** غارات جيش وخيّاله
صباح والا هجاد الليل *** ما احد تهنَّى مقياله
الهجن من فوقها شجعان
أسود ونمور وذيابه
السيف والرمح جاله شان
ورَدْوُا على الموت حرّابه
* * *
ستين قرمٍ قادهم عبدالعزيز
ستين شهمٍ عالي الجبهه عزيز
* * *
تالي اللّيل... من قبل الصباح
كلّش سكت
إلاّ النّفَسّ... مثل الريّاح
وللقلوب دْفوف
وللعيون سْيوف
وللهقاوي صْياح
* * *
تخطّوا نخيل.. وبيوت والقصر الطويل
تعلّوا الخوف.. والموت.. والهمّ الثقيل
* * *
وثارت بنادقهم
وصاحت حناجرهم
والتفّت السّاق بالسّاق
وطاحت اعناق.. وارتفعت اعناق
* * *
ولاح الصباح
ودعا داعي الفلاح
أذّن علَى قصر الحكم
عِلْم.. وْعَلَمْ
* * *
الحكم لله ثم ابو تركي الإمام
عبد العزيز.. النّادر.. الحُرّ.. القطام
* * *
قامت العرضات والعزّ انتشَى
والنِّسا في كل بيتٍ غطرفت
والفرح في كل خفّاق وْحشا
والرّكايب بالرّسايل بشّرت
* * *
يا رياض المجد نجم العزّ ناض
أنشر الفرحه علَى باقي الرياض
الحسا، وابها، وحايل، والحجاز
الوطن يا راية التوحيد فاز
* * *
ليتك يا بو تركي تشوف
دارك هنوف
دارك علَى الدنيا تنوف
* * *
ليتك تشوف عيالك
ليتك تشوف رْجالك
الّلي علَى ساسك بنوا
الّلي عَلى دربك مشوا
* * *
في كل قريه دار للعلم وضمان
في كل شارع دار للمال وْامان
* * *
في كل حيٍ مسجد
وفي كل صوبٍ معهد
* * *
والنّور عم اقصَى البلاد *** وكل وادي له طريق
حتَى البحر جانا حلو *** حلاةْ مختوم الرحيق
* * *
منّا علَى روحك يا بوتركي سلام
لو كان ما تسمع لنا صوتٍ قريب
ياعالي الهمّات لَى اشتد الزّحام
يا صانع الامجاد يا الشّهم النّجيب
يا جابر العثرات في جنح الظلام
يا ناصر المظلوم يا ملجا الغريب
حلحيل عنده ينتهي كل الكلام
سيرة حياته كلها عطرٍ وطيب
* * *
يا دارٍ لنا حقّك علينا
لَى زمَى العايل زمينا