لولا غرايبْها مرضْني ملَلْها
رتابة الأيّام من طَبْع أهَلْها
اليوم مثل أَمْسي وباكِرْ كما اليوم
دقايق وْساعاتْ وايّام بَلْها
ما أَعْيب الأيّام من غير إنْجازْ
وما أضْيع الخَطْوات من دون امَلْها
وما أَعْجز الشّكْوَى على صوت قادِرْ
وما أَخْطَر السَّطْوه بيمْنَى جهَلْها
ويا حَسْرة الواعِدْ إذا ما فَعَلْها
ويا خَيْبة الآمال إذا طال أجَلْها
أعايش أيّامي ولو ما حيتْني
وكلّ الّليال الّلي تثاوب كسَلْها
أسلِّي الخاطر بأَحْلام شاعرْ
وارْسم على دَمْع المآقي غزَلْها
وشالتْني الأحْلام خارجْ زماني
في بَرزْخٍ كلّ النّوادِرْ شمَلْها"
شاهدْت به ماغيّب الوقت عنّي
متْعة جمال الرُّوح باسْمَى مثَلْها
أشْجار حكْمه فوقها وارِق الرّأي
وبَسْمات زَهْراتٍ على الدّرْب وَلْها
وابْداع فكْرٍ عَطَّرَه نَشْوة انْسامْ
ريح الخزامى فايِحٍ مَعْ نفلْها
لو انّها للنّفْس مَرْبعْ ومصْيافْ
أفك مَرْبوط الحصان وْجمَلْها